۔”اسماؓءبنت یزید انصاری سے روایت ہے

349۔”اسماؓءبنت یزید انصاری سے روایت ہے کہ ایک بار رسول اللہ صلی اللہ علیہ وسلم میرے پاس سے گزرے، میں اس وقت اپنے پڑوس کی سہیلیوں کے ہمراہ تھی، آپ نے ہمیں سلام کیا اور فرمایا: محسنوں کی ناشکری اور ناقدری سے بچو

تم میں سے ایک اپنے والدین کے ہاں عرصہ دراز تک بے بیاہی رہتی ہے پھر اللہ تعالیٰ اسے شوہر کی نعمت سے ہم کنار فرماتا ہے پھر اس کے ہاں اولاد کی چہل پہل ہوتی ہے ان تمام احسانات کے باوجود اگر کبھی بات پر شوہر سے شکر نجی ہو جاتی ہے تو اس لمبی رفاقت کو نظر انداز کرتے طوطاً چشمی سے کہہ اٹھتی ہے کہ میں نے کبھی تجھ سے اچھا سلوک دیکھا ہی نہیں۔ توضیح: اس روایت سے کئی باتیں معلوم ہوتی ہیں۔

1۔ اگر کہیں عورتوں کا مجمع ہو، اور تہمت کا اندیشہ بھی نہ ہو تو نا محرم ان کو سلام کر سکتا ہے۔

2۔ اس حدیث میں عورت کے ایک خاص مزاج اور افتاد طبع کو بیان کیا گیا ہے کہ اگر کبھی شوہر سے ذراسی ناراضگی ہو جائے تو ایک لمحہ میں اس کا سارا کیا کرایا ملیا میٹ کر دیتی ہے صحیح معنی میں گھریلو فضا اسی وقت خوش گوار ہو سکتی ہے جبکہ شوہر کی صرف خامیوں اور عیوب پرہی نگاہ نہ ہو بلکہ اس کے محاسن اور خوبیوں کا بھی اعتراف کیا جائے یہی ہدایت ایک دوسری حدیث میں مردوں کو بھی کی گئی ہے جیسا کہ فرمایا: ”کوئی مومن مرد شوہر کسی مومن عورت بیوی سے بعض نہ رکھے، اور اگر کی ایک عادت ناپسند ہوتو ہو سکتا ہے کہ اس کی دوسری عادت اسے بھلی معلوم دے جائے۔

تصنع اور جھوٹ

350۔ بروایت اسماءؓ ایک عورت نے کہا: یا رسول اللہ! میری ایک سوکن ہے کیا میرے لیے اس میں کوئی حرج ہے کہ شوہر جو کچھ مجھے دیتا ہے اس کے علاوہ بھی میں سوکن پر اپنی آسودگی اور خوش پوشی کا مظاہرہ اس طرح پر کروں کہ یہ سب کچھ شوہر ہی دے رہا ہے؟ آپ نے فرمایا: ،یہ واقعہ خوش حالی کا اظہار کرنے والا اس شخص کی طرح ہے جس نے جھوٹ کا لباس زیب تن کیا ہوا ہے۔“ تشریح: انسان فی الواقع جتنا کچھ ہے اپنے لباس اور وضع قطع سے بھی اسی قدر اس کا اظہار ہونا چاہیے۔ فخر و نمائش یا دوسروں کو چڑانے کیلئے واقعہ کے خلاف اپنی پوزیشن بڑھ چڑھ کر دکھلانا بھی ایک قسم کا جھوٹ ہی ہے۔

مرعوبیت اور نقالی

351۔ ”حضرت عبداللہ بن عمرؓ سے روایت ہے کہ رسول اللہ صلی اللہ علیہ وسلم نے فرمایا: جو کسی قوم کی مشاہت اختیار کرتا ہے تو وہ انہی میں شمار ہوتا ہے۔“ توضیح: ممنوع تشبہ کی دو صورتیں ہو سکتی ہیں۔

1۔ کوئی مسلمان اپنا خلیہ اور رہین سہن کا ڈھانچہ اس طرح مسخ کر ڈالے کہ غیر مسلموں سے بظاہر کوئی امتیاز باقی نہ رہے۔

2۔ مسلم معاشرہ کا کوئی فردیا مسلمان من حیث القوم غیر مسلموں کا شعار قومی نشان اختیار کر لیں ان کے علاوہ غیر مسلم اقوام کی تہذیب یا رسم و رواج میں سے اگر مفید اجزا اپنا لیے جائیں تو یہ اس حدیث کے منافی نہیں ہے۔ جیسا کہ روایت میں ہے کہ رسول اللہ صلی اللہ علیہ وسلم نے تنگ آستینوں والا رومی جبہ اور کوٹ زیب تن فرمایا۔ یا مثلاً ام حبیبہؓ کے مشورہ سے آپ نے اہل حبشہ کے رواج کے مطابق عورتوں کے جنازے پر پردے کیلئے کماندار تیلیاں لگوائیں۔ اسی طرح آپ نے سلمان فارسیؓ کے مشورہ سے غزوہ احزاب کے موقع پر ایرانیوں کے طریقے کے مطابق خندق کھدوائی۔

شرکت اور شخصیت پرستی

352۔ ”ابوالہیاج اسدی سے روایت ہے کہتے ہیں کہ مجھ سے حضرت علیؓ نے کہا: میں تمہیں اس کام پر بھیجتا ہوں جس کام پر مجھے رسول اللہ صلی اللہ علیہ وسلم نے بھیجا تھا کہ جہاں کوئی تصویر دیکھو اسے مٹا دو اور جہاں کوئی اونچی قبر دیکھو اسے برابر کر دو۔“ توضیح: شرک اور شخصیت پرستی کے اسباب میں سے دو بڑے سبب اس حدیث میں بیان کیے گئے ہیں۔

شاہانہ کروفر

353۔ ”قدامہؓ سے روایت ہے کہ میں نے رسول اللہ صلی اللہ علیہ وسلم کو قربانی کے دن سرخ و سپید اونٹنی پر سوار جمرہ کو کنکریاں مارتے دیکھا۔ اس موقع پر نہ مارپیٹ تھی نہ ڈانٹ ڈپٹ تھی اور نہ ہٹو بچو کا ہنگامہ۔“ تشریح: جس طرح عام طور پر شاہی سواریوں کے آگے شان و شوکت، جاہ و جلال اورہٹو بچو کے مظاہرے ہوتے ہیں، رسول اللہ صلی اللہ علیہ وسلم کی زندگی اس سے یکسر پاک تھی۔

شاہانہ جاہلی امتیاز کا خاتمہ

354۔ ”حضرت ابو مسعود انصاریؓ سے روایت ہے کہ رسول اللہ صلی اللہ علیہ وسلم نے اس بات سے منع فرمایا ہے کہ امام کسی اونچی جگہ کھڑا ہو اور لوگ اس کے پیچھے یعنی اس سے نیچے کھڑے ہوں۔“